INTROITO
Anque parixca mentira (por
o tardi que s’ha nimbiau) o numero anterior estió rematau antis
d’as elezions d’o 12-M, asinas que no podiemos congratular-mos por o feito
de que a la fin salise eslexiu “l’agüelo” ta las Cortes de Madrí.
Agora caldrá asperar
a bier qué i fa u qué le dixan fer. Por o menos, sí
que baldrá ta que bels españolazos esluziernen en sentir
l’aragonés, anque nomás siga que con ixo de “chunta”.
En omenaxe, publicamos a
suya canta “Aragón” con a bersión
en aragonés, de traza que rime y pueda cantar-se.
Tamién tos presentamos
dos intresans proyeutos d’ambiesta internazional: Terralingua,
una asoziazión eco-lingüistica, y Transfrontiers,
ta fer torismo de traza economica y conzenziada (que l’estiu ye en tornar
un cantón).
A bier si Fablilandia se
bocha y se dixa beyer por o mundo mundial...
23-A???
Ista añada s’ha batiu
toz os “records” d’inesistenzia d’o Diya d’Aragón: antimás
de coinzidir, como de cutio, con o diya d’o libro y o de Castiella la biella,
ista añada lo feba con l’Aberri Eguna (Arzalluz sabe portar-se ta
istas ocasions...) y, más que más, con as bacanzias de “semanasanta”.
Asinas que a cosa se quedó en cuatro autos istituzionals, garra
mobida rebindicatiba y a más gran parti d’a chen en a placha u en
os lugars.
A tele? Bels segundos a
meyodiya en a cadena estal... y prou! As atras s’adedicoron nomás
que a os bascos (son más maloooos!) y a Eliansito.
Isto mos fa remerar o que
ya en proposaba beluno: no estaría millor dixar San Chorche como
patrón (como lo fan en Cataluña) y pasar o Diya Nazional
ta o 20 d’abiento u ta o 29 de chunio y fer-lo rebindicatibo de berdá?
U se trata d’ixo, de que no lo siga?
ZIBER-FUELLAS
Os tiempos d’internet plegan
mesmo ta Fuellas, a más beterana y conserbadora d’as publicazions
en aragonés y asinas, dende fa un par de “lumeros” ya puede leyer-se
en o rete:
www.aramedia.org/fuellas/index.htm
IX PREMIO ANA ABARCA DE BOLEA
O Consello d'a Fabla Aragonesa, con l'aduya economica d'a Diputacion Provincial de Uesca, ha feito a clamadura d'a nuena edizion d'o premio "Ana Abarca de Bolea" ta libros de poesía en aragonés, correspondién a l'añada 2000, seguntes os siguientes regles:
1-Os treballos consistirán
en un libro inedito de poemas escritos en aragonés.
2-Se presentarán
tres copias d'os treballos, feitos a maquina u en ordinador, a doble espazio
y a una sola cara, y con una amplaria d'entre 600 y 1.200 bersos.
3-Os treballos lebarán
un tetulo y un lema, os cuals se cuaternarán e una carpeta postal
zarrada, drento d'a que se meterán o nombre y dos apellius y l'adreza
de l'autor/a, asinas como lo lugar y calendata de naxenzia y a profesión
u quefers.
4-Os treballos s'endrezarán
por correu zertificau ta o Consello d'a Fabla Aragonesa, trestallo postal
147, E-22080 Uesca, antis d'o 30 d'otubre d'o 2000.
5-O fallo d'o premio y as
presonas que composan o churau se ferá saber publicamén en
abiento d'o 2000.
6-O premio consitirá
en 100.000 pezetas ta l'autor/a y a publicazión d'a obra ganadora.
7-O churau podrá
dezidir no atorgar o premio a denguna d'as obras presentadas, asinas como
atorgar menzión espezial a beluna/s y consellar a suya publicazión.
L'autor/a con menzión espezial recullirá un premio de 25.000
pezetas. En dengún caso pueden trestallar-sen os diners d'o premio
y d'a menzión espezial; si alcaso, o churau podría atorgar
una segunda menzion espezial, sin de pre en diners, pero podendo consellar
tamién a publicazión d'a obra. A suya dezisión ye
inapelable.
8-A obra ganadora y, en
o suyo caso, a obra u obras que tenesen menzión espezial, serán
publicadas, senguntes as normas graficas de l'aragonés emologadas
en abril de 1987, por a editorial Publicazions d'o Consello d'a Fabla Aragonesa,
qui s'alza os dreitos d'a primera edizion, a cuala tiendrá una edizion
minima de 500 exemplars.
9-Os treballos presentaus
que no se reclamen en o plazo de 30 días naturals, que empezipiarán
a contar dende a calendata en que se faiga publica a dezisión d'o
churau, quedarán en propiedá d'o Consello d'a Fabla Aragonesa.
10-A presentazión
a iste premio suposa l'adempribio d'istos regles.
BIELSA POR AS ESTAMPETAS PLURALS
O Conzello de Bielsa estió
lo primero d’Aragón en refirmar o Manifiesto d’a campaña
“Estampetas Plurals” (beyer Prexi nº97) empentada por a Organització
pel Multilingüisme (y a Crica de Cultura Aragonesa en o nuestro país).
O refirme, en o pleno ordinario
de l’onze de febrero de 2000 estió aprebau por unanimidá.
Posteriormén sólo
tenemos notizia que d’o refirme de Salbatierra d’Esca... En qué
son pensando ixos atros conzellos “de pedigrí”? (Y os de no “pedigrí”,
que o tema mos afeuta a toz...).
Por zierto, que en o tocán
a partius politicos, nomás lo han feito que Chunta Aragonesista
y Inziatiba Aragonesa... Án son o PAR y os atros que botoron a fabor
d’o Ditamen de Politica Lingüistica?
