A falordia d'a coraleta
Rezentan os biellos d'un lugarón d'Aragón una falordieta que os más aparaters dizen que alcurrió de berdá. 
Tornaba o tío Lionzio á o suyo lugar con as primeras luzes de l'albada, con un carguillón de güegos que lebaba o suyo chicot somero. China chana iban enantando lo camín enta par d'o suyo lugarón. Beniban dende a cabezera d'a redolada. Allí, agún cuan yera de nuei, en l'azoque, eban trucau  dos barquetas de prescos tardanos por unas duzenas de güegos, que agora carriaba o suyo permenau somero. Iban aprezisaus, ta arribar-ie antis de que se'n ise o frescor d'o maitín y se malmetese o carguillón.
Allora, en empezipiar á puyar o puerto que deseparaba la bal de o lugar, de bote y boleyo o borrico se bi aturó y se negó á continar a puyadeta que teneba debán.
O tío Lionzio percutíu, en primeras, soltó un churamento y li fotió un breu y xuto truco con o tochet que de cutio portiaba con er. L'animal, dica allora obedién, no pas se alticamó. Asinas pos, repetió dica tres begadas a mesma operazión con semellans resultas. L'ombre s'en baxo y prenendo os razéns escomenzipió á arrullar-ne. O unico que aconsiguió estió belún que atro bramiu. Se metió dezaga á empentar-ne por as ancas, pero cosa. O cuatropedia no se i bochó ni brenca ni meya. Parixeba que dimpués de fer todas as prebatinas fesables, aquer pullín bi yera fixau á o sulero d'o camín como una caparra.
Tanimientres, o sol enzetaba ya a suya puyada cutiana. Acucutaba ya por as tucas d'os pueyos y montañetas sobrexindo os primers rayos entre as carrascas y pins d'os marguins d'o carrerón.
O canso y escamallau tío Lionzio, remató por posar-se-ne á o costau d'o camín. Drento d'a suya suyiza angluzia, empezipiaba á prexinar como se iban á malmeter os güegos con a calor. Encluso ya i beyeba esbolastriar una locada de pollez denzima d'as ancas d'o suyo burricallo.
No supo por qué, pero se quilló d'un brinco y se metió á rechirar aintro d'o suyo alforchán. En l'azamallo que li abeba parau a muller suya i trobó una coraleta. En ixe inte,  por a suya capeza li pasó una ideya que li produzió un esbrunze de bertigo, pero á o cabo y a la fin a situgazión ya yera prou desesperada, asinas que dezidió meter-la en prautica.
Talló con a suya fuxaina a mitá d'a coraleta. S'en fue dezaga de l'animal, con una man li debantó a coda y con l'atra li'n ficó por o boforón. En primeras o pobrón abrío parexió no sentir cosa, pero ascape preto á tremolar, metió os güellos cuasi en blanco y empezipió una eslampada á tot estrús, puyando a costera como un caballo de carreras y dixando dezaga d'er solo que una ripa de polbo.
O tión i remanió unos intes arrapau entre a boira de polbo debantada. Ascape preto er tamién á encorrer á o barrenau animal que se bi yera tresbatiendo dezaga d'a primera marrada que bi eba en o camín.
Profés, con o trachín d'a fuyida, os güegos parixeban que esen estau bullindo aintro d'as alforchas y agora brincaban fuera ta esclatar-se-ne y petar-se-ne contra o sulero, sembrando-ne tot.
Lionzio correba tanto como podeba pero paró cuenta que yera por demás. Nunca pillarba á aquer endiaplau animal. Asinas que se aturó un inte.
 En o puerto, de maitinada, nomás se ascuitaban os suyos chalfegos y os gramitos d'o pullín, ixo sí, cada begada más luen.
Debán iste espeutaclo de güegos crebaus, un'atra ideya esnabesó como un eslampiu o suyo esmo. Ista begada, talmén por a cansera u o suyo desaspero, no paró cuenta en as fesables consecuenzias. D'ista traza, lebau por a suya delera por remontar l'abalguau carguillón, ficó a man en a suya pocha. Sacó l'atra metá d'a coraleta que bi alzaba. Güelló arredol y no beyendo-ie á dengún,  s'en baxó os balons y os calzons, y la se fotió por o mesmo puesto que á o suyo somero.
Os sintomas no se fazión asperar y antimás estión parellans. Quiéntos chilos que surtión d'a suya gola! Asabelo que no en teneban guaire d'umán. Cuasi s'asemellaban más a os otilius d'un monstro. Pretó á correr fendo aparatos como un espritugau. Cualsiquier que li ese beyiu, ese churau aber alufrau bella mena de maldau.
En ista barrenada carrera, malas que estió a la par de l'animal, con as poquetas fuerzas que li restaban se agafo á o cuello d'o borrico fendo-li-bi aturar, anque o que á er berdaderamén li aganaba yera correr encara más á causa d'ixa xera que li bi yera cremando aintro los bodiellos.
En zagueras, o tío Lionzio y o suyo compañer, dentrón en o lugar (ya bien ficau o maitín), escalferius, escamallaus y fendo o papel. Pero con o tozuelo bien altero, lebando como tot carguillón meya duzena de güegos, alto u baxo frescos, que o nuestro presonache s'en abaló ixe mesmo diya con buena magra; ixo sí, los se minchó quillau.
Esparbel