DIALEUTOS
de
l'aragonés
Mapa
seguntes "El Aragonés hoy"(*)
| 1. Aragonés
Ozidental |
2. Aragonés
Zentral |
3. Aragonés
Oriental |
| 4. Aragonés
meridional |
5. Catalán
d'Aragón |
6. Castellano d'Aragón |
Criterios alazetals:
Os criterios que gosan emplegar-se ta amugar os conzellos que pertenexen
a o dominio lingüistico aragonés son, aparti de l'emplego d'un
amplo lesico, a superbibenzia de bels elementos morfoloxicos y sintauticos
alazetals: os articlos determinaus (en cualsiquiera d'os suyos paradigmas),
a preposizión "ta", o complemento pronomino-alberbial "en/ne", os
demostratibos "ixe, ixa, ixo", os plurals en "-ns, -ls, -rs", indefinius
como "cosa" y "bel", imperfeutos d'endicatibo en "-eba, -iba", perfeutos
simples d'o tipo "puyés"...
Asinas, en os lugars
an encara s'alzan istos aspeutos como menimo, se considera que bi remane
o tarabidau alazetal d'a luengua, anque siga prou estricallau, como elemento
diferén a o castellano. Seguntes istos criterios, as mugas estarían
marcadas por una línia que chuntase os lugars siguiens: Fago - Biel
- Biscarrués - Almudébar - Barbués - Torres d'Alcanadre
- Berbegal - Fonz - Capella - Bal de Lierp - Bal de Bardaxí - Bisaurri
- Benás.
L'aragonés
ozidental s'estendilla por a rexión d'o Biello Aragón
(en as redoladas d'a Chazetania y o Sarrablo) y comprende bariedaz locals
de zereña presonalidá y cautibo literario como lo cheso (bal
d'Echo) y l'ansotano (bal d'Ansó), que alzan prou bien os rasgos
alazetals de morfoloxía y sintasis, y atras más castellanizadas
como lo chaqués (Campo de Chaca), l'aragonés d'a bal de l'Estarrún,
d'Aragüés u d'a Canal de Berdún. Predominan os articlos
determinaus "o, a", eszeuto en Echo, Aragüés y Chasa (an s'alzan
os articlos plenos "lo, la"), y s'emplegan os partizipios en "-au, -iu".
L'aragonés
zentral ye amugau entre os ríos Galligo y Zinca y entre os Pirineos
y a Guarguera. Como bariedaz locals cal destacar o tensino (bal de Tena),
o panticuto (Panticosa), o bergotés (bal de Broto), o belsetán
(bal de Bielsa) y l'aragonés de Ballibió, asinas como los
repuis de Tierra de Biescas, Fiscal y a Guarguera (prauticamén espoblada
güei diya). Os articlos son "o, a" eszeuto cuan ban dezaga de bocal,
que se'n alza la forma plena "lo, la", prenunziada /ro, ra/, con /r/ simple.
S'emplegan os partizipios en "-ato, -ito", en coderenzia con a cheneral
conserbazión d'as consonans xordas entrebocalicas. Tamién
gosan sonorizar as oclusibas xordas dezaga de nasal u liquida ("cambo,
aldo").
L'aragonés
oriental plega dende a Zinca dica l'Esera, prenzipiando es iste río
as fablas de transizión enta o catalán. As barians locals
más carauteristicas son o chistabín (bal de Chistau), o benasqués
(bal de Benás) y o fobano (A Fueba), aparti d'o complexo d'o ribagorzano,
en o cualo puede distinguir-se l'altorribagorzano (con o campés
-Campo-), o ribagorzano meyo (con o grausino
-Graus-) y o baxorribagorzano (con o estadillano -Estadilla- u o fonzense
-Fonz-). Os articlos son "el, la, es, las" y s'emplegan os partizipios
en "-au, -iu". Más trucadizo ye l'emplego d'o perfeuto simple perifrastico
(d'o tipo "bas puyar" en puesto de "puyés"), a perda d'a "-r" zaguera
en a prenunzia (/fe/ en puesto de /fer/) y a palatalizazión d'a
"l-" inizial u en os grupos "pl, fl y cl", propia de tot o ribagorzano
(asinas, "plorar" ye prenunziau /pljorá/).
L'aragonés
meridional ye o risultau d'a confluyenzia d'os diferens dialeutos y
a superazión d'as particularidaz locals en pasar as sarras pre-pirinencas;
ye o más omoxenio, pero tamién o más castellanizau
y se fabla en a redolada d'Ayerbe, A Sotonera y os semontanos de Uesca
y de Balbastro. L'emplego d'os articlos "o, a" ye cheneral (anque bi ha
islotes de "lo, la" en bels lugars d'o Semontano de Balbastro, en Lo Grau
y en Nabal) y os partizipios rematan en "-au, -iu" fueras de bel caso de
lesicalizazión ("forato", "caminata", etz). Ye a bariedá
más afeutada por barbarismos foneticos y bulgarismos d'orixen castellano.
Baxando d'Almudébar enta o sur sólo puede fablar-se que de
castellano con más u menos repuis aragoneses.
(*)
El Aragonés hoy, F.Nagore y Ch.Gimeno, Publicazions d'o CFA,
Uesca, 1989
