Chuanet se’n fue a crosidar
enta casa Molinero,
pero no ibi era la dueña
y d’allí fue enta otro puesto.
Truqué con lo clamador;
y de lo canto lo fuego
li contesteron: -Quí clama?
-Yo, Chuanet, que quiero un güebo!

Baxé la moza un cabazo,
cuasi un cabazo terrero,
de güebos, que a caramullo
daba gloria de bier-los.
Allí Chuanet regolvié
y se quedaba sin güellos
por trobar de dos robillos
rezién poniu uno fresco.
La mesacha, más que aguda,
con muito y sobrau salero
s’arrieba una miqueta
de biyer-li’n regolber-los.

A’l fin Chuanet lo trobé
a pur d’abrir bien los güellos,
y con lo güebo en las zarpas
se’n iba enta lo cubierto
sin de dixar-li a la moza
balura por lo jenero.
Ella biyé que se’n iba
y lo clamé dende dentro.
Tornando de mala gana,
Chuanet li pagué lo güebo.

Se’n fue mirando enta tierra
(pero abergonzau, ni un pelo!)
cabilando: “Dos robillos,
bien poliu que lo me’n lebo;
pero he dixau tres diners,
que ixo ye lo que más siento!”

Indo así remoloniando,
torné enta casa en un berbo
y a’l trobar-se con lo padre,
li dizié lo que eba feito.
-Mui mal! -li dizié su padre
con riseta de coniello-
Bi ha que fer lo que se piensa,
que así yo fo cuando puedo;
siempre de cara enta casa
¡los tres diners y lo güebo!

-Así l’he queriu fer, padre,
talmente como li’n cuento,
pero ella, ye poco larga!,
no s’ha dixau, no por zierto!
Me clamé cuando me’n iba;
yo torné, me calé dentro
y le dizié qué quereba.
“Ascuita, Chuan, un momento”,
y asimismo dizié ella:
“De lo nuestro ponedero,
porque tu yes como yes,
mui a gusto lo te zedo;
de dos robillos lo lebas,
pués biyer-te mui contento
que otri pue que m’afloxase
seis diners... y curta quedo.
Agora, si quiers, lo pagas;
y si no, bienga lo güebo!,
que chobeneta aprendié:
La balura u lo jenero!”

A l’acabar lo relato,
Chuanet se chupé lo dedo
y su padre se rascaba
por un canto lo tozuelo
prexinando: “Tres diners
y pa Chuanet..., caro güebo!
Abré que mirar si trobo
de otri bel ponedero!
Bi ha que trayer enta casa
los tres diners y lo güebo!
(u calar-lo en otra d’amo,
de la dueña y lo jenero)”.

*******

Yera ya en la primabera.
Con los chelos de l’ibierno
a pur de morgoniar tanto
lo padre y Chuanet, tan tercos,
dando Gúeltas y más güeltas
a los diners y lo güebo,
pos que l’han calau en casa,
d’amo, con papels, que han feito.
No s’arríe pon la dueña
cuando fablan de lo pleito.
Él sí que s’arríe a ormino,
que li salié bien lo cuento:
que s’ha metiu en la pocha
los tres diners y lo güebo!